«Գնահատման եվ թեստավորման կենտրոն»

ՀՀ կառավարության որոշումով 2004 թվականին ստեղծվեց «Գնահատման և թեստավորման կենտրոն» պետական ոչ առևտրային կազմակերպությունը: Նման կառույց ստեղծելու անհրաժեշտությունը պայմանավորված էր վերջին տարիներին կրթական ոլորտում տեղի ունեցող լուրջ փոփոխություններով`ուղղված մեր կրթության որակը միջազգային ասպարեզում ընդունելի և ճանաչելի դարձնելուն:
Գնահատման և թեստավորման կենտրոնի առաքելությունն է արդյունավետ և բարձրորակ գործունեությամբ նպաստել համընդհանուր փոխադարձ վստահության և հարգանքի մթնոլորտի ստեղծմանը: Կենտրոնի հանրակրթության գնահատման համակարգի հիմնական բաղադրիչ դառնալը պայմանավորված է հանրակրթական հաստատություններում կրթության որակի արտաքին գնահատման գործունեության իրականացմամբ:
Գնահատման նոր համակարգի սկզբունքներն են`

• միասնական չափանիշների կիրառում հանրապետության ողջ տարածքում,

• օբյեկտիվ, վստահելի, արդյունավետ և թափանցիկ մեխանիզմների ներդրում,

• շրջանավարտների համար հավասար մեկնարկային պայմանների ստեղծում` նրանց հետագա մասնագիտական կրթությունն ապահովելու նպատակով,

• դպրոցից բուհ անցումային քննությունների գործընթացում սուբյեկտիվ գործոնի դերի առավելագույնս նվազեցում:

Կենտրոնի համապատասխան ենթակառույցները (քննությունների կազմակերպման, թեստաբանության, համակարգչային և վերլուծական աշխատանքների, հրատարակչական բաժիններ)  գնահատման համակարգը կատարելագործելու և առավել արդյունավետ դարձնելու նպատակով մշակում և իրագործում են սեփական գործունեության կազմակերպման և ներքին կառավարման ժամանակակից մեթոդներ ու միջոցներ:
Կենտրոնի առջև դրված նպատակներից բխում են նրա գործունեության հետևյալ հիմնական ուղղությունները.

1. Հանրակրթական հաստատությունների ընթացիկ, փոխադրական և ավարտական քննությունների անցկացման հայեցակարգի մշակում և իրականացում:

2. Հանրակրթական հաստատությունների արտաքին գնահատման արդյունքների վերլուծություն և հանրակրթության որակի ապահովման համար անհրաժեշտ բարեփոխման խնդիրների ձևակերպում:

3. Գնահատման համակարգի կայացմանն ու զարգացմանը միտված հետազոտական աշխատանքների կազմակերպում և նորարարական գործունեության իրականացում:

4. Մասնակցություն կրթության որակի ուսումնասիրության միջազգային հետազոտական ծրագրերին և ինքնուրույն ազգային հետազոտական ծրագրերի իրականացում:

5. Հայաստանի Հանրապետությունում հանրակրթության գնահատման համակարգի իմաստի ու նշանակության, ինչպես նաև նրա կայացման առկա իրավիճակի ու հեռանկարների վերաբերյալ հասարակության գիտակցական պատկերացումների ձևավորման գործընթացների իրականացում:

ԳԹԿ աշխատակազմը առաջնորդվում է այն գաղափարով, որ յուրաքանչյուր աշակերտի, այսինքն` նաև վաղվա ուսանողի համար պետք է հնարավորություն ստեղծվի, որպեսզի նա հավասար պայմաններում կրթություն ստանա, դրսևորի իր կարողությունները և ավելացնի գիտելիքների պաշարը` մասնագիտական լավ պատրաստվածության հասնելով: Այս առումով, դպրոցի ավարտական և բուհի ընդունելության քննություններն այն առանցքային փուլերն են, որոնց օբյեկտիվ ու արդար կազմակերպումը առողջ մրցակցային պայմաններ են ստեղծում ինչպես սովորողի, այնպես էլ կրթօջախների միջև: 
Գնահատման նոր համակարգը նպաստում է դպրոցի վարկանիշի բարձրացմանը, կրթական ոլորտի տարբեր օղակների միասնական և արդյունավետ գործունեության իրականացմանը: